అక్కినేని కొత్త కోడలిని మెగాస్టార్‌కి ప‌రిచ‌యం చేసిన నాగార్జున

‘ఏఎన్నార్ జాతీయ అవార్డు’ 2024 కార్యక్రమం అన్నపూర్ణ స్టూడియోలో జరిగింది. ఈ కార్యక్రమానికి ప్రముఖ బాలీవుడ్ నటుడు అమితాబ్ బచ్చన్ ముఖ్య అతిథిగా హాజరయ్యారు. మెగాస్టార్ చిరంజీవికి 2024 సంవత్సరానికి గాను ‘ఏఎన్నార్ జాతీయ అవార్డు’ వరించింది. బాలీవుడ్ నటుడు అమితాబ్ బచ్చన్ చేతులు మీదుగా చిరంజీవి ఆ అవార్డును అందుకున్నారు. ఈ వేడుకకు చిరంజీవి కుటుంబ సభ్యులు, నాగార్జున కుటుంబ సభ్యులు, పలువురు నటీనటులు, నిర్మాతలు, దర్శకులు హాజరయ్యారు.
ఈవెంట్‌లో తన కాబోయే భార్య శోభితా ధూళిపాళతో కలిసి నాగ చైతన్య వచ్చాడు. అయితే అక్కినేని నాగార్జున తన కాబోయే కోడలు శోభితను ఒకే వేదికపై మెగాస్టార్ చిరంజీవికి పరిచయం చేయడం అందరి దృష్టిని ఆకర్షించింది.